ଭୁବନେଶ୍ଵର : ରଙ୍ଗର ପର୍ବ ହୋଲିରେ ବାହାରକୁ ପ୍ରଚାରକୁ ନଯାଇ ବାସ ଭବନଠାରେ ଶୁଭେଚ୍ଛୁ ଓ ସମର୍ଥକ ମାନଙ୍କ ଗହଣରେ କିଛି ସମୟ ଖୁସି ବାଣ୍ଟିଥିଲେ ବିଜେଡିର ଭୁବନେଶ୍ୱର ମହାନଗର ନିଗମର ମେୟର ପ୍ରାର୍ଥୀ ଶ୍ରୀମତୀ ସୁଲୋଚନା ଦାସ । ସକାଳ ୭ଟାରୁ ଦିନ ୨ଟା ପର୍ଯ୍ୟନ୍ତ ଲୋକମାନଙ୍କର ଧାଡ଼ି ଲାଗିଥିଲା । ବୁଦ୍ଧିଜୀବି, ନେତା, କର୍ମୀ ଓ ସମର୍ଥକ ମାନେ ଆସି ଶୁଭେଚ୍ଛା ଜଣେଇବା ସହ ସମର୍ଥନ ଜଣାଇଥିଲେ ।
ଅପରାହ୍ନ ପ୍ରାୟ ୩ଟା ବେଳେ ୱାର୍ଡ ନମ୍ୱର 39ସ୍ଥିତ ବାଲୁଙ୍କେଶ୍ବର ମନ୍ଦିର ପାଖରୁ ଶାସ୍ତ୍ରୀ ନଗର ସ୍ଥିତ ହନୁମାନ ମନ୍ଦିର ଯାଏ ଏକ ବିଶାଳ ଶୋଭାଯାତ୍ରାରେ ଯାଇ ସମର୍ଥକ ମାନଙ୍କୁ ଭେଟିଥିଲେ ଶ୍ରୀମତୀ ଦାସ । ଏହି ଶୋଭଯାତ୍ରାରେ ବିଜେଡି କର୍ମୀଙ୍କ ସହ ସ୍ଥାନୀୟ ଜନତା, ସମର୍ଥକ, ସ୍ଥାନୀୟ ଯୁବକ ସଙ୍ଘର କର୍ମକର୍ତ୍ତା ମାନେ ସକ୍ରିୟ ଅଂଶ ଗ୍ରହଣ କରିଥିଲେ । ତା’ପରେ ଶୋଭାଯାତ୍ରା 30 ନମ୍ୱର ୱାର୍ଡ ସ୍ଥିତ ରୂପାଲି ଛକ ଦୁର୍ଗା ମଣ୍ଡପ ଦେଇ ମହର୍ଷି କଲେଜ ପାଖରେ ପହଞ୍ଚିଥିଲା । ପ୍ରତି ସାହି, ଗଳି ଓ ଛକ ଜାଗାରେ ସ୍ଥାନୀୟ ମହିଳା, ପୁରୁଷ ଓ ଗୁରୁଜନ ମାନେ ଶ୍ରୀମତୀ ଦାସଙ୍କୁ ଅଭିନନ୍ଦନ ଜଣାଇଥିଲେ । ପ୍ରତିବଦଳରେ ଶ୍ରୀମତୀ ଦାସ ମଧ୍ୟ ହୋଲିର ଶୁଭେଚ୍ଛା ଜଣାଇବାକୁ ଭୁଲିନଥିଲେ ।
ଏହାପରେ 34 ନମ୍ୱର ୱାର୍ଡସ୍ଥିତ ଶାନ୍ତିପଲ୍ଲୀ ବସ୍ତି ଦେଇ ଶୋଭାଯାତ୍ରା ଆଗକୁ ବଢିଥିଲା । ଶୋଭାଯାତ୍ରା ପ୍ରେସ କଲୋନୀ ଦେଇ ଶ୍ରୀୟା ଟକିଜ୍ ଛକଠାରେ ପହଞ୍ଚିଥିଲା । ଶୋଭାଯାତ୍ରାର ଆରମ୍ଭରୁ ଶେଷ ଯାଏଁ ଏଥିରେ ଯୋଗ ଦେଇଥିବା ଲୋକ ମାନଙ୍କ ଭିତରେ ହୋଲିର ଉତ୍ସାହ ଓ ଆନନ୍ଦ ବାରି ହୋଇ ପଡୁଥିଲା । ତା’ରି ଭିତରେ ଜନତାଙ୍କର ଲୋକପ୍ରିୟ ନେତା ଶ୍ରୀମତୀ ଦାସଙ୍କୁ ସେମାନଙ୍କ ଗହଣରେ ପାଇ ଲୋକମାନଙ୍କର ଉତ୍ସାହ ଓ ଆନନ୍ଦ ଦ୍ୱିଗୁଣିତ ହେବାର ଦେଖା ଯାଇଥିଲା । ଅପରାହ୍ନରୁ ସନ୍ଧ୍ୟା ଯାଏଁ ଚାଲିଥିବା ଏହି ଶୋଭାଯାତ୍ରାରେ ସମର୍ଥକ ମାନଙ୍କର ସକ୍ରିୟ ଅଂଶ ଗ୍ରହଣରେ ବେଶ୍ ଆକର୍ଷକ ଲାଗୁଥିଲା ।
ସନ୍ଧ୍ୟା ସମୟରେ ୪୧ ନମ୍ୱର ୱାର୍ଡ ସ୍ଥିତ କେଦାରପଲ୍ଲୀ ଠାରେ ଶୋଭାଯାତ୍ରାଟି ଏହାର ଅନ୍ତିମ ପର୍ଯ୍ୟାୟରେ ପହଞ୍ଚିଥିଲା । ହୋଲି ଅବସରରେ ନିଜ ସମର୍ଥକ ମାନଙ୍କ ଉଦ୍ଦେଶ୍ୟରେ ବାର୍ତ୍ତା ଦେଇ ଶ୍ରୀମତୀ ଦାସ କହିଥିଲେ ” ଶାନ୍ତି, ମୈତ୍ରୀ ଓ ଭାଇଚାରାର ପର୍ବରେ ଆପଣମାନଙ୍କ ସହ ଥିବା ସମ୍ପର୍କକୁ ଆହୁରି ସୁଦୃଢ଼ କରିବା ପାଇଁ ଯେଉଁ ସୁଯୋଗ ମୋତେ ମିଳିଛି ସେଥିପାଇଁ ମୁଁ ବେଶ୍ ଆନନ୍ଦିତ । ଏଥିପାଇଁ ବିଜେଡି ସୁପ୍ରିମୋ ଶ୍ରୀ ନବୀନ ପଟ୍ଟନାୟକଙ୍କ ପାଖରେ ମୁଁ ବିଶେଷ ଭାବେ କୃତଜ୍ଞ । ଏହି ସୁଯୋଗ କାରଣରୁ ଏ ବର୍ଷର ହୋଲି ମୋର ଚିର ସ୍ମରଣୀୟ ହୋଇରହିବ ” ।