ନୂଆଦିଲ୍ଲୀ : ଗୋଟିଏ ଅନୁଷ୍ଠାନ ପକ୍ଷରୁ ଗୋଟିଏ ସହରରେ ଗୋଟିଏ ନର୍ସିଂ କଲେଜ ପ୍ରତିଷ୍ଠା ନେଇ ରହିଥିବା କଟକଣାକୁ ହଟେଇବାକୁ ସଂସଦରେ ଆଜି ଦାବି କରିଛନ୍ତି ସାଂସଦ ଭର୍ତ୍ତୃହରି ମହତାବ। ଲୋକସଭାରେ ଏକ ଧ୍ୟାନ ଆକର୍ଷଣକାରୀ ପ୍ରସ୍ତାବ ଜରିଆରେ ସେ ଏହି ଦାବି ଉପସ୍ଥାପନା କରିଛନ୍ତି।
ସେ କହିଛନ୍ତି ଯେ, ବର୍ତ୍ତମାନ ସମୟରେ ଦେଶର ସ୍ବାସ୍ଥ୍ୟସେବା ପାଇଁ ତାଲିମପ୍ରାପ୍ତ ନର୍ସଙ୍କର ବହୁତ ଆବଶ୍ୟକତା ରହିଛି। ନର୍ସମାନେ ହେଉଛନ୍ତି ସ୍ବାସ୍ଥ୍ୟସେବାର ମେରୁଦଣ୍ଡ ଏବଂ ସେମାନେ ଡାକ୍ତର ଓ ରୋଗୀଙ୍କ ମଧ୍ୟରେ ପ୍ରାଥମିକ ସେତୁ ଭଳି କାର୍ଯ୍ୟ କରିଥାନ୍ତି। କିନ୍ତୁ ବର୍ତ୍ତମାନର ଏହି କଟକଣା ଯୋଗୁ ନର୍ସିଂ ଶିକ୍ଷାର ବିକାଶର ଏକ ବଡ ବାଧକ ସାଜିଛି। ଦେଶରେ ବଢୁଥିବା ସ୍ବାସ୍ଥ୍ୟସେବାର ଚାହିକାକୁ ଦେଖିଲେ ଉଭୟ ସରକାରୀ ଓ ବେସରକାରୀ ହସ୍ପିଟାଲଗୁଡିକରେ ବହୁ ସଂଖ୍ୟାରେ ତାଲିମପ୍ରାପ୍ତ ନର୍ସଙ୍କ ଆବଶ୍ୟକତା ରହିଛି।
ସଂସଦରେ ଭାରତୀୟ ନର୍ସିଂ କାଉନସିଲ ବଦଳରେ ନ୍ୟାସନାଲ ନର୍ସିଂ କମିଶନ ଗଠନ ପାଇଁ ସଂସଦରେ ବିଲ ପାସ ହୋଇସାରିଛି। ଏହି ସମୟରେ ଗୋଟିଏ ଅନୁଷ୍ଠାନ ଦ୍ବାରା ଗୋଟିଏ ସହରରେ ଗୋଟିଏ ନର୍ସିଂ କଲେଜ ଭଳି ପୂରୁଣା ପ୍ରଥାର ଉଚ୍ଛେଦ କରାଯିବାର ସୁଯୋଗ ସୃଷ୍ଟି ହୋଇଛି। ଏହି କଟକଣା ହଟାଗଲେ ପ୍ରତିଷ୍ଠିତ ଅନୁଷ୍ଠାନ, ସୋସାଇଟି କିମ୍ବା ଟ୍ରଷ୍ଟଗୁଡିକ ତାଲିମପ୍ରାପ୍ତ ବୃତିଗତ ନର୍ସ ସୃଷ୍ଟି କରିବା ପାଇଁ ଭିତ୍ତିଭୂମି ସୃଷ୍ଟି କରିପାରିବେ ବୋଲି ସେ କହିଛନ୍ତି।
