ମାଲକାନାଗିରି: ବଣ୍ଡା ଘାଟିରେ ଓଡ଼ିଶାର ରାଜ୍ୟପାଳ ପ୍ରଫେସର ଡକ୍ଟର ଗଣେଶୀ ଲାଲ। ସ୍ୱତନ୍ତ୍ର କଡ଼ା ସୁରକ୍ଷା ବ୍ୟବସ୍ଥା ଭିତରେ ରାଜ୍ୟପାଳ ମୁଦୁଲିପଡ଼ାରେ ଥିବା ସୀମା ସୁରକ୍ଷା ବଳ (ବିଏସଏଫ) କ୍ୟାମ୍ପରେ ହେଲିକ୍ୟାପ୍ଟରରେ ପହଞ୍ଚିଥିଲେ। ପରେ ସେଠାରୁ ସେ କାରରେ ବଣ୍ଡା ଘାଟିର ସୀତା କୁଣ୍ଡ ପାଖକୁ ଯାଇଥିଲେ ।ସୀତା କୁଣ୍ଡରୁ ଅଯୋଧ୍ୟାରେ ତିଆରି ହେଉଥିବା ଭବ୍ୟ ରାମ ମନ୍ଦିର ପାଇଁ ଜଳ ସଂଗ୍ରହ କରିଛନ୍ତି । ତା ପରେ ସେ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଇଥିଲେ।
ସୀତା କୁଣ୍ଡରୁ ଜଳ ସଂଗ୍ରହ କରିବା ପରେ ବଣ୍ଡା ମହିଳାଙ୍କ ନାଚ ଗୀତର ତାଳେ ତାଳେ ରାଜ୍ୟପାଳଙ୍କୁ ସେଠାରେ ଥିବା ରାମ ମନ୍ଦିରକୁ ପାଛୋଟି ନିଆ ଯାଇଥିଲା। ସେଠାରୁ ରାଜ୍ୟପାଳ ଯାଇ ଆୟୋଜିତ ହୋଇଥିବା ରାଷ୍ଟ୍ରୀୟ କବି ସମ୍ମିଳନୀରେ ଯୋଗ ଦେଇଥିଲେ। ଏହି ଅବସରରେ ସେ ବଣ୍ଡା ଜନଜାତିର ମୁଖ୍ୟ ସୁରେନ୍ଦ୍ର ନାଏକଙ୍କୁ ମଞ୍ଚ ଉପରେ ସମ୍ମାନିତ କରିଥିଲେ। ଏହା ପରେ ରାଷ୍ଟ୍ରୀୟ କବି ସମ୍ମିଳନୀର ଅଧ୍ୟକ୍ଷ ଜଗଦୀଶ ମିତ୍ତଲ ରାଜ୍ୟପାଳଙ୍କୁ ସମ୍ୱର୍ଦ୍ଧିତ କରିଥିଲେ। ବଣ୍ଡା ଜନଜାତିର ବିକାଶ ପାଇଁ ରାଜ୍ୟପାଳ ତାଙ୍କ ନିଜସ୍ୱ ପାଣ୍ଠିରୁ ୫ ଲକ୍ଷ ଟଙ୍କା ସହ ତାଙ୍କୁ ପାଛୋଟି ନେଉଥିବା ବଣ୍ଡା ମହିଳାମାନଙ୍କ ପାଇଁ ଆଉ ୧ ଲକ୍ଷ ଟଙ୍କା ପ୍ରଦାନ କରିବେ ବୋଲି ସେ ଘୋଷଣା କରିଛନ୍ତି। ଯାହାକୁ ନେଇ ବଣ୍ଡା ଘାଟିରେ ଖୁସିର ଲହରୀ ଖେଳିଯାଇଛି।
ମାଓ ସମସ୍ୟା ଯୋଗୁ ଦୀର୍ଘ ଦିନ ଧରି କୌଣସି ଉଚ୍ଚ ପଦସ୍ଥ ଅଧିକାରୀ ବଣ୍ଡା ଘାଟିକୁ ଯାଇ ନଥିଲେ। ବଣ୍ଡା ଘାଟିରେ ଦୁଇଟି ବିଏସଏଫ କ୍ୟାମ୍ପ ସ୍ଥାପନ ହେବା ପରେ ଆଜି ପ୍ରଥମ ଥର ପାଇଁ ରାଜ୍ୟପାଳ ବଣ୍ଡା ଘାଟିକୁ ଗସ୍ତ କରିଛନ୍ତି । ରାଜ୍ୟପାଳଙ୍କ ଗସ୍ତ ସମୟରେ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା। ଏବେ ଅଯୋଧ୍ୟାରେ ତିଆରି ହେଉଥିବା ଭବ୍ୟ ରାମ ମନ୍ଦିର ପାଇଁ ଦେଶର ଯେଉଁ ସ୍ଥାନରେ ଶ୍ରୀରାମଙ୍କ ପାଦ ପଡ଼ିଥିଲା ସେହି ସ୍ଥାନରୁ ଜଳ ସଂଗ୍ରହ କରାଯାଉଛି। ଏହି କ୍ରମରେ ଏଠାରେ ଥିବା ସୀତା କୁଣ୍ଡରେ ଶ୍ରୀରାମଙ୍କ ବନବାସ ସମୟରେ ସୀତା ଗାଧୋଇଥିଲେ ବୋଲି ବିଶ୍ୱାସ ରହିଛି । ସେଥିପାଇଁ ଏହି ସୀତା କୁଣ୍ଡରୁ ରାଜ୍ୟପାଳ ଗଣେଶୀ ଲାଲ ଜଳ ସଂଗ୍ରହ କରିଛନ୍ତି ।
